O modelo actual de produción e distribución de alimentos ten graves impactos na vida da xente e na nosa contorna. Abuso de pesticidas e fertilizantes químicos, monocultivos, deforestación, acaparameento de terras ou despoboamento das zonas rurais, son só algúns dos problemas que nos afectan de maneira decisiva.
Este modelo industrial non só ameaza a agricultura local e a pequena escala, senón a alimentación mundial. Non é a falta de alimentos a causa da fame, senón unha repartición desigual dos recursos agrarios e alimentarios.
A expansión da agricultura industrial, en mans dunhas poucas empresas, é un dos detonantes desta situación. O gran negocio da alimentación expulsou das súas terras a parte da poboación mundial, compromete a biodiversidade agraria e gandeira e acapara boa parte dos solos fértiles e a auga do mundo.
En Amigos da Terra loitamos por unha agricultura e alimentación ecolóxica e local que cubran as necesidades das persoas produtoras e consumidoras. Defendemos que as persoas sexan o principal obxectivo da produción, distribución e consumo de alimentos.
Para conseguilo traballamos para avanzar cara á soberanía alimentaria global e local, baseándonos en solucións agrícolas diversas e locais. Cremos que é necesario recuperar a agricultura ao servizo da xente, e non do beneficio das grandes empresas agroalimentarias.
Con este fin propoñemos:
A relocalización da produción e distribución de alimentos fomentando as canles curtas de comercialización: venda directa, mercados locais, grupos de consumo, etc.
Unha política agraria que incentive a produción de alimentos sans de maneira respectuosa co medio ambiente e que fomente o crecemento da poboación rural.
Unha agricultura libre de transxénicos como condición indispensable para que o sector agrario manteña a capacidade de decidir sobre as súas sementes.
A compra pública responsable de alimentos. Cada ano as administracións gastan grandes cantidades de diñeiro público para prover de alimentos os colexios, hospitais etc. Os criterios de proximidade e xeración de emprego no medio rural deben ser parte das compras públicas.
A incorporación de xente nova á actividade agraria: Escola de Acción Campesiña. Para que a produción de alimentos deixe de estar en mans dunhas poucas empresas é necesario que máis persoas novas se incorporen ao sector agrario. A Escola de Acción Campesiña proporciona formación e acompañamento para avanzar no cambio agrocoecolóxico cara á soberanía alimentaria.