No marco do traballo de difusión e sensibilización que Amigos da Terra está a desenvolver no eido da soberanía alimentaria, queremos tratar desta vez a problemática da especulación alimentaria e as súas consecuencias nos países empobrecidos.
Trátase dunha práctica de compravenda anticipada de alimentos básicos mediante contratos de futuros entre produtores/as e axentes intermediarios, un tipo de acordo que obriga a fixar as cantidades e os prezos de compra aos/ás produtores/as moito antes da colleita e sen ter en consideración outras variables que poidan influir na produción final.
A determinación do prezo á baixa dos alimentos, o pago de determinados intereses aos intermediarios, e a participación de entidades financeiras que invisten en alimentos co obxecto de sacar beneficio económico provocou nos últimos anos un incremento de prezos que agravou a situación de fame nas rexións empobrecidas. Os especuladores xogan con este tipo de operacións determinando o prezo de mercado dos alimentos e mercando e vendendo os mesmos segundo os prezos estean baixos ou altos, co obxecto de acadar un beneficio económico. Mentres tanto, nos países empobrecidos, o incremento dos prezos dos alimentos provoca que a poboación teña que destinar cada vez unha maior parte dos seus ingresos aos mesmos, poñendo en risco a súa supervivencia e incrementando a porcentaxe de poboación mundial que se atopa en situación de fame.
Para explicar e denunciar esta complexa problemática de dramáticas consecuencias para os países do Sur, onde os alimentos se están a converter cada vez máis en activos financieros para o enriquecemento de especuladores privados, Amigos da Terra achega este vídeo producido por WEED que en 7 minutos amosa o funcionamento do mercado de alimentos básicos e os efectos que se están a manifestar nas rexións desfavorecidas.
